Pákistan aldaǵy táýlikterde Úndistan tarapynan soqqy bolýy múmkin ekenin málimdedi

ASTANA. KAZINFORM — Islamabad shabýyl jasalǵan jaǵdaıda «sheshýshi jaýap» berýge ýáde berdi, dep habarlaıdy Kazinform tilshisi.

Pákistannyń Aqparat jáne habar taratý mınıstri Attaýlla Tarrar sársenbi kúni Úndistannyń jospary týraly «senimdi aqparaty» bar ekenin aıtty.

— Bizde Úndistan Pákistanǵa qarsy aldaǵy 24-36 saǵat ishinde Pahalgamdaǵy oqıǵaǵa qatysy bar degen negizsiz jáne oıdan shyǵarylǵan aıyptaýlarmen áskerı is-qımyl jasamaq nıeti týraly senimdi aqparat bar, — dedi mınıstr.

Nıý-Delı Úndistan basqaratyn Kashmırdegi jaqynda jasalǵan shabýyldy áskerı áreketke «jalǵan syltaý» retinde paıdalanbaq, dedi Tarrare.

Ol «kez kelgen mundaı áskerı avantıýraǵa sheshýshi jáne dereý jaýap beriletinin» atap ótti.

Ol Pákistannyń ózi «terrorızmniń qurbany jáne osy zulymdyq týdyrǵan azapty tereń túsinedi» dep qosty.

— Biz terrorızmdi álemniń kez kelgen jerinde, onyń barlyq túri men kórinisterin árqashan aıyptadyq, — dedi ol.

Aıta keteıik, 22 sáýirde tanymal Pahalgam qalasynda qarýly top terakt jasaǵan bolatyn. 25 Úndistan azamaty men bir Nepal azamaty qaza taýyp, kóp adam jaralandy.

Úndistan bıligi Djammý men Kashmırde jappaı tintý júrgizip, 1500-den astam adamdy jaýap alý úshin qamaýǵa aldy. Kúdikti sodyrlarǵa tıesili on úı qıratyldy.

Polıtsııanyń málimetinshe, shabýyl jasady degen tórt adamnyń úsheýi anyqtaldy: ekeýi Pákistan azamaty jáne bireýi Úndistan basqaratyn Kashmır azamaty. Tórtinshi týraly ázirge aqparat joq. Tiri qalǵandardyń kóbi sodyrlardyń úndilik azamattardy arnaıy nysanaǵa alǵanyn aıtady.

Shabýylǵa jaýapkershilik Pákistandaǵy «Lashkar-e-Taıba» uıymymen baılanysy bar Resistance Front dep atalatyn shaǵyn topqa júkteldi. Alaıda keıinirek ol óziniń shabýylǵa qatysy baryn joqqa shyǵaratyn málimdeme jasady.

Premer-mınıstr Narendra Modı seısenbide Qorǵanys mınıstri Radjnat Sıngh, ulttyq qaýipsizdik jónindegi keńesshi Adjıt Doval jáne barlyq úsh qyzmet basshylarynyń qatysýymen keńes ótkizdi.

Úndistan premer-mınıstri Narendra Modı shabýylǵa kináliler «ádil jazalanatynyn» jáne el qylmyskerlerdi «álemniń kez kelgen jerinen» taýyp, jazalaıtynyn aıtty.

Buǵan deıin úndilik BAQ keshe túnde Pákistan armııasy Djammý men Kashmırdegi Pargaval sektorynda Úndistanmen shekarada oq jaýdyrǵanyn habarlaǵan.