Pákistan AQSh pen Iran kelissózderiniń sátti ótýine bar kúshin salatynyn málimdedi
KARAChI. KAZINFORM – Pákistan premer-mınıstri Shahbaz Sharıf AQSh pen Iran arasyndaǵy kelissózderdiń sátti ótýi úshin eliniń barlyq múmkindikti qoldanatynyn málimdedi, dep habarlaıdy Anadolu.
– Erteń eki eldiń basshylyǵy Islamabadqa bizdiń shaqyrýymyzben kelissózder júrgizý úshin keledi. Pákistan bul kelissózderdiń tabysty ótýi úshin bar kúshin salady. Bul – kúrdeli mindet. Nátıjesi Jaratqannyń qalaýyna baılanysty, – dedi ol halyqqa teleúndeýinde.
Sharıf bul kelissózder kezeńi turaqty bitimge qol jetkizý jolyndaǵy sheshýshi sát ekenin atap ótti.
Pákistan basshysy Vashıngton men Tegeranǵa eki aptaǵa jarııalanǵan ýaqytsha bitimge keliskeni úshin alǵys bildirip, azamattardy kelissózderdiń sátti ótýi úshin duǵa jasaýǵa shaqyrdy.
Aıta keteıik, Pákistan Túrkııa, Qytaı, Saýd Arabııasy jáne Mysyrmen birlesip, 28 aqpannan beri jalǵasqan qaqtyǵystan keıin AQSh pen Iran arasynda eki aptalyq bitimge qol jetkizýge yqpal etken.
Kelisim aıasynda taraptar Islamabadta kezdesip, turaqty beıbitshilik máselesin talqylaýǵa ýaǵdalasqan.
AQSh delegatsııasyn Djeı Dı Vens bastap keldi. Onyń quramynda arnaıy ókil Stıv Ýıtkoff jáne Djared Kýshner bar.
Iran delegatsııasyn parlament spıkeri Mohammad-Bager Galıbaf basqarady. Sonymen qatar, kelissózderge Irannyń syrtqy ister mınıstri Abbas Aragchı qatysady dep kútilýde.
