Pákistan AQSh pen Iran arasyndaǵy deldaldyqty rastady
ASTANA. KAZINFORM – Pákistan AQSh pen Iran arasyndaǵy janama kelissózder Islamabadtyń deldaldyǵymen júrgizilip jatqanyn rastady, dep habarlaıdy Kazinform agenttiginiń menshikti tilshisi.
Pákistannyń syrtqy ister mınıstri Ishak Dardyń aıtýynsha, taraptar arasyndaǵy baılanys tikeleı emes, habar almasý arqyly júzege asyrylyp jatyr. Buǵan deıin Vashıngton Tegeranǵa 15 tarmaqtan turatyn usynystar tizimin joldaǵan, qazir ony Iran tarapy qarastyrýda.
– Shyn máninde AQSh pen Iran arasyndaǵy janama kelissózder Pákistan arqyly jetkiziletin habarlamalar arqyly júrip jatyr, – dedi mınıstr.
Onyń aıtýynsha, deldaldyq protsesine Túrkııa men Mysyr da qosylǵan. Sonymen qatar birqatar memleket kelissózderdiń ilgerileýine qoldaý kórsetip otyr.
Bul – Pákistannyń eki el arasyndaǵy dıplomatııalyq baılanysta deldal rólin atqaryp otyrǵanyn alǵash ret resmı túrde rastaýy.
Pákistan premer-mınıstri Shehbaz Sharıf pen syrtqy ister mınıstrligi Iran bıligimen, sondaı-aq Parsy shyǵanaǵy elderindegi odaqtastarmen, sonyń ishinde Saýd Arabııasymen turaqty baılanys júrgizip otyr. Dıplomatııalyq kúsh-jigerge eldiń áskerı basshylyǵy, sonyń ishinde armııa basshysy Asım Mýnır de qatysýda.
Al Irannyń syrtqy ister mınıstri Abbas Aragchı Vashıngtonmen tikeleı kelissóz júrgizilip jatqanyn joqqa shyǵardy. Degenmen ol habarlamalar «dostas elder» arqyly jetkizilip jatqanyn rastady jáne Tegeran óz ustanymynan bas tartpaıtynyn aıtty.
Mysyrdyń syrtqy ister mınıstri Badr Abdelatı de Kaırdiń Túrkııa jáne Pákistanmen birge deldaldyq protseske qatysyp jatqanyn málimdedi. Onyń aıtýynsha, óńir elderi shıelenisti ýshyqtyrmaı, dıplomatııalyq jolmen sheshýge múddeli.
Parsy shyǵanaǵy arab memleketteri yntymaqtastyq keńesiniń bas hatshysy Jasem ál-Býdaıvı uıymǵa múshe elder AQSh pen Iran arasyndaǵy kez kelgen kelissózge qatysýǵa múddeli ekenin aıtty. Ol dıplomatııalyq sheshimderge basymdyq beriletinin, biraq memleketterdiń ózin-ózi qorǵaý quqyǵy saqtalatynyn atap ótti.
Buǵan deıin Iran AQSh-tyń soǵysty toqtatý týraly josparynan bas tartqany habarlanǵan.