Pákistannyń soltústiginde laı kóshkininen 11 adam qaza tapty
Jergilikti kóshpendiler taıpasy eshkilerin aıdap, Shoýnter asýynan ótip bara jatqan kezde kóshkin bastalǵan.
Taǵy 25 adam jaraqat aldy, qutqarý operatsııasy jalǵasyp jatyr. Pákistannyń premer-mınıstri Shehbaz Sharıf adamdardyń qaza tabýyna baılanysty kóńil aıtyp, mundaı oqıǵalar klımattyń ózgerýine baılanysty jıilep ketkenin málimdedi.
Jergilikti polıtsııa qaza tapqandar arasynda tórt áıel men tórt jasar bala bolǵanyn rastady, dep habarlady Associated Press agenttigi.
Qutqarýshylar laı kóshkini aımaǵyna onyń qashyqtyǵy men ótetin jeri qıyn bolǵandyqtan kedergilerge tap boldy. Áskerıler qutqarý operatsııasyn júrgizýge jergilikti bılikke kómektesken. Eki áskeoı tikushaq áýege kóterildi.
Kýágerlerdiń aıtýynsha, jergilkti turǵyndar da adamdardy qutqarýǵa kómektesken.
Premer-mınıstr Sharıf Twitter-degi akkaýntynda «apattyń úlken qaıǵy ákelgenin jáne adamdar qaza tapqanyn» atap ótti.
«Klımattyń ózgerýiniń saldarynan Pákistanda osyndaı jaǵdaılar jıilep ketti. Búkil álem Pákistan sııaqty damýshy elderdi qorǵaýǵa mindetti», - dep esepteıdi premer-mınıstr Sharıf.
Pákistannyń soltústik aımaqtary klımattyń ózgerýinen aýa raıynyń tótenshe jaǵdaılaryna jıi tap bolady.
Aımaqty keıde «úshinshi polıýstiń» bóligi dep ataıdy, óıtkeni onda polıarlyq aımaqtardan tys álemniń basqa jerlerine qaraǵanda muzdyq kóp.
Bul úlken muzdyqtardyń keıbireýleri klımattyń ózgerýine baılanysty erip, 3 myńnan astam kól paıda boldy. Ótken jyly elde 1700-den astam adamnyń ómirin qıǵan joıqyn sý tasqyny boldy
