Pákistannyń Karachı qalasynda lańkestik árekettiń saldarynan 31 adam qaza tapty
ASTANA. Jeltoqsannyń 29-y. QazAqparat - Pákistannyń Karachı qalasyndaǵy lańkestik árekettiń saldarynan qaza tapqandardyń sany 31 adamǵa jetti. 70-ten astam adam jaralandy.
Bul týraly jergilikti polıtsııaǵa silteme jasap ITAR-TASS agenttigi habarlaǵan.
Lańkes-jankeshtiniń bombany shııt-musylmandardyń Muhamed paıǵambardyń nemeresi ımam Hýseındi eske alý qurmetine uıymdastyrǵan Ashýra rásimi kezinde iske qosqany budan buryn habarlaǵan bolatyn. Kýágerlerdiń aıtýynsha, qurbandar sany budan da kóp bolýy múmkin edi - Qudaı saqtap, jankeshti toptyń ortasyna óte almaı, bombany qaptaldas tuıyq kóshelerdiń birinde iske qosqan.
Rásimge qatysqan jáne lańkestikten keıin qandary qaınaǵan shııtter jaqyn mańdaǵy qurylystardy qırata bastaǵan. Oqıǵa ornynda 50-den astam dúken men saýda núktelerine jaıylǵan órt áli órship tur.
Eldiń quqyq qorǵaý organdary, bul lańkestik árekettiń pákistandyq ekstremıst-tálibterdiń isi bolýy múmkin ekenin aıtady. Biraq ta, shabýylǵa súnnıt-musylmandardyń lańkestik uıymdarynyń da qatysy bolý múmkindigi joqqa shyǵarylmaı otyr.
