Pákistannyń eks-prezıdenti sot ǵımaratynan qashyp shyqty
ASTANA. 19 sáýir. QazAqparat - Pákistannyń burynǵy prezıdenti Pervez Mýsharraf ony kepilge bosatý týraly úkimdi qaıta qarastyryp, otanyna opasyzdyq jasady degen aıyppen ony qamaýǵa alý týraly sheshim qabyldanǵannan keıin Islamabadtaǵy sot ǵımaratynan qashyp ketti. Bul týraly Associated Press-ke silteme jasaı otyryp RBK habarlaıdy.
Burynǵy Prezıdenttiń saqshylary polıtseılerdi joldan ıterip, oǵan sot ǵımaratynan shyǵýǵa kómektesti. P.Mýsharraf kóligine sekirip mindi. Eks-prezıdent óziniń Islamabad syrtyndaǵy kúzeti bar záýlim úıine bet aldy. Esterińizge salaıyq, ústimizdegi jyly naýryz aıynda Pákistannyń burynǵy basshysy bes jyl qýǵynda júrgennen keıin otanyna qaıtyp oraldy. Oǵan deıin ol elge kelgen jaǵdaıda qamaýǵa alynbaıtyndyǵy týraly kepildikke ıe bolǵan: 22 naýryzda sot saıasatker túrmege túspeýi úshin kepil tóleýge ruqsat etti. Alaıda, búgingi sot dál osy ýaqytsha bosatý merzimin sozýdan bas tartty.
P.Mýsharraf saıası mansabyn jalǵastyrmaq nıette elge oralǵan edi. Ol bıylǵy jyldyń mamyr aıynda ótetin saılaý barysynda «óz partııasyna kómekteskeli» jatqanyn málimdegen bolatyn. Atap aıtqanda, burynyraq ol Búkilpákistandyq musylmandyq lıgany basqarǵan.
Alaıda, Peshavar qalasyndaǵy sot sheshimimen oǵan 11 mamyrǵa belgilengen saılaýǵa qatysýǵa tyıym salynǵan.
P.Mýsharraf óz erkimen prezıdenttik laýazymdy tastap ketip, 2008 jyly eldi tastap ketken, osy ýaqyt boıy ol Birikken Arab Ámirlikterinde jáne Ulybrıtanııada turyp kelgen. Onyń óz erkimen jer aýdarýyna sol kezdegi eldiń premer-mınıstri Benazır Bhýttony óltirýge qatysty dep aıyptalýy sebep bolǵan.
