Pákistannyń burynǵy prezıdenti Pervez Mýsharraf qaıta tutqyndaldy
ASTANA. 11 qazan. QazAqparat - Pákistannyń burynǵy prezıdenti Pervez Mýsharraf 2007 jyly Lal-Masdjıd meshitindegi arnaıy operatsııa kezinde qaza bolǵan 100 adamnyń ólimine qatysty degen aıyppen tutqyndalǵan bolatyn.
Pákistannyń burynǵy prezıdenti juma kúni sot aldynda jaýap beredi, dep habarlanýda.
Sársenbi kúni sot Mýsharrafty basqa isti tergeý sheńberinde bosatty. Soǵan baılanysty eks-prezıdenttiń qorǵaýshylary keshe «ol endi azat adam» dep málimdegen edi. Ol kezde Mýsharraf basqa aıyppen túrmede otyrǵan. Ol aıyptardyń ishinde Benazır Bhýttonyń da ólimi bar.
Atap óteıik, Pákistannyń burynǵy prezıdenti, ári bas qolbasshysy 2008 jyldan beri erikti aıdaýda júrgen, alaıda bıyl saıası alańǵa qaıta oralý úshin elge qaıtyp kelgen bolatyn.
