Pákistannyń burynǵy premer-mınıstrin óltirý isi boıynsha memlekettik aıyptaýshyny atyp ketti
ASTANA. 3 mamyr. QazAqparat - Pákistannyń burynǵy premer-mınıstri Benazır Bhýttony óltirý isi boıynsha sot úderisindegi memlekettik aıyptaýshy Chodrı Zýlfıkar Alı Islamabadta oqqa ushty.
Bul jaıynda «Ál-Jazıra» telearnasynyń saıtynda habarlandy.
Pákistandyq BAQ-tyń málim etýlerine qaraǵanda, belgisiz bireýler Zýlfıkar Alıdiń kóligine oq jaýdyryp, sonyń saldarynan ol qaza tapqan. Shabýyl kezinde memlekettik aıyptaýshydan basqa adamdardyń zardap shekkendigi jaıynda esh aqparat joq.
Juma kúni Bhýttonyń ólimine qatysty prokýror sotqa qatysýy tıis bolatyn. Bul is boıynsha basty aıyptalýshylardyń biri - Pákistannyń burynǵy prezıdenti Pervez Mýsharraf. Oǵan Bhýttonyń qaýipsizdigin jetkilikti dárejede qamtamasyz etken joq degen aıyp taǵylýda.
Pákistannyń oppozıtsııalyq halyqtyq partııasyn basqarǵan Benazır Bhýtto 2007 jyldyń jeltoqsan aıynda sherý kezinde qaza tapqan bolatyn. Onyń ólimin tyńǵylyqty tergeý tek 2009 jyly ǵana BUU-nyń aralasýymen qolǵa alynǵan edi.
