Pákistannyń burynǵy basshysyna elden ketýge ruqsat berildi
ASTANA. QazAqparat - Pákistannyń Joǵarǵy soty sársenbi kúni úkimetke burynǵy prezıdent Pervez Mýsharrafqa elden shyǵýǵa salynǵan tyıymdy alyp tastaý jóninde sheshim qabyldady. Osylaısha sot úkimettiń apellıatsııasyn quptamady.
P.Mýsharraftyń qorǵaýshylary eks-prezıdenttiń omyrtqasynyń aýyrýyna baılanysty sheteldegi dárigerler kómegine júginýi kerek dep málimdegen. Mundaı emdik sharalar Pákistanda jasalmaıdy.
General Mýsharraf 2001 jyldan 2008 jylǵa deıin prezıdent qyzmetinde bolǵan. Al 2008 jyly elden ketti. 2013 jyly Pákistanǵa oralǵan Mýsharraf parlamenttik saılaýǵa qatysýdy josparlaǵan, alaıda el bıligi oǵan birqatar aıyp taqty.
General óziniń kinásiz ekenin aıtyp, bul iske saıası sebepter túrtki bolyp otyrǵanyn bildirdi.
