Pákistannyń burynǵy basshysy prezıdent saılaýyna qatysatyn boldy
ASTANA. 8 sáýir. QazAqparat - Pákistannyń soltústik-batysynda ornalasqan Chıtral qalasyndaǵy saılaý komıssııasy eldiń burynǵy basshysy, general Pervez Músharafqa 11 mamyr kúni ótetin saılaýǵa qatysýyna múmkindik berdi.
Bul jaıynda «Novostı» aqparat agenttigine silteme jasaı otyryp, muslim.kz habarlaıdy.
«Onyń qujattary durys. Sottyń da qarsylyǵy joq. Sol sebepti, biz odan bas tarta almaımyz», - dep málimdedi saılaý komıssııasynyń qyzmetkeri Jamal Han.
Generaldyń týǵan úıindeı bolyp ketken Karachı qalasyndaǵy saılaý komıssııasy onyń kandıdatýrasyn quptamaǵan bolatyn. Buǵan onyń básekelesiniń ótinishi sebep boldy. Báskelesiniń aıtýynsha, ol 2007 jyly tótenshe jaǵdaı jarııalap, el konstıtýtsııasyn buzǵan kórinedi. Sondaı-aq, osydan buryn Pendjab provıntsııasyndaǵy Kasýr okrýginen de onyń saılaýǵa qatysýyna ruqsat berilmegen edi.
General Pervez Músharaf el bıligine 1999 jylǵy áskerı tóńkeris arqyly kelgen bolatyn. Ol osy orynda tapjylmaı, taban aýdarmaı on jyldaı otyryp, 2008 jyly oppozıtsııanyń tegeýrindi áreketinen keıin bılikten bas tartýyna týra keldi. 2013 jyldyń sońyna taman ol osy ýaqytqa deıin óziniń turaqty mekenine aınaldyrǵan Londonnan Pákistanǵa qaıtyp oraldy. Ol Búkilpákistandyq musylman lıgasyna (All Pakistan Muslim League) jetekshilik etedi.
Dese de, ol 2006 jyly Belýdjıstan provıntsııasynda kóz jumǵan ultshyldar kósemi Ákbar Býgtıdiń jáne 2007 jyly dúnıeden ozǵan eks-premer Benazır Bhýtonyń qazalary úshin, sondaı-aq, osy jyly tutqyndalǵan Joǵarǵy sot tóraǵasynyń basyndaǵy jaǵdaı úshin aıyptalyp otyr. Ótken aptada Karachı shaharyndaǵy áldebir qorǵaýshy ony tutqyndamaý týraly ımmýnıtettiń ýaqytyn uzartqan sottan shyǵyp kele jatqan oǵan báteńke laqtyrǵan bolatyn. Úndilik Outlook basylymynyń deregine qaraǵanda, osyǵan baılanysty qorǵaýshy Ákbar Býgtıdiń uly - Shahzaın Býgtıdiń qolynan 200 myń pákistandyq rýpıı (2 myńdaı dollar shamasyndaǵy qarajat) alǵan kórinedi.
Dúısenbide Pákistannyń Joǵarǵy soty Pervez Músharafty 2007 jyly engizilgen tótenshe jaǵdaıǵa baılanysty «opasyzdyq» baby boıynsha sotqa tartýdy talap etken Ravallınd qalasynyń sottar qaýymdastyǵynyń basshysy Taýfıq Asıftiń petıtsııasyn qaraýǵa bel baılap otyr.
