Pákistandaǵy jarylys: Zardap shekkender sany 200-ge jetýi múmkin
ASTANA. QazAqparat – Pákistanda Djamıat Ýlema Islam-Fazl (JUI-F) ıslam partııasynyń saılaýaldy mıtıngi kezinde bolǵan kúshti jarylystan 44 adam qaza tapty.
Shabýyldy eldegi jaǵdaıdy ýshyqtyrýǵa tyrysqan jıhadshylar uıymdastyrýy múmkin, dep habarlaıdy QazAqparat VVS-ge silteme jasap.
VVS-ge bılik ókilderiniń habarlaýynsha, polıtsııada jarylysty jańkeshti lańkes jasaǵanyna dálelder bar.
Túrli derekkózder boıynsha, zardap shekkender sany 200-ge jetýi múmkin. Aýdandy qorshaýǵa alǵan qaýipsizdik qyzmeti qurbandar sany odan kóp bolýy yqtımal ekenin eskertti, sebebi mıtıngke 500-ge jýyq adam qatysqan.
Jergilikti telearna efırinde jedel járdem qyzmetteri jaralanǵan adamdardy jergilikti aýrýhanaǵa qalaı jetkizip jatqandary kórsetildi. Al asa aýyr naýqastardy tikushaqpen Peshavara emhanalaryna jiberip jatyr.
Jergilikti aýrýhanada dáriger de, kereýet te jetispeıdi. Olar mundaı kóp naýqasty qarap úlgermeı jatyr. Jaralanǵandardyń keıbiri kómek kútip dálizderde jatyr.
Jergilikti bılik ókilderiniń habarlaýynsha, jarylys saldarynan JUI-F aımaqtyq kóshbasshysy Maýlana Zıaýlla da mert boldy. Jarylys ol jaqtastaryna sóz sóılep jatqan kezde bolǵan.
JUI-F – iri dinı saıası partııa. Ol Pákistan parlamentindegi úkimet koalıtsııasynyń quramyna kiredi. Har qalasyndaǵy mıtıng elde bıyl kúzde ótýi kerek jalpyulttyq parlament saılaýy qarsańynda uıymdastyryldy.
Osyǵan deıin Pákistannyń Haıber-Pahtýnhva provıntsııasyndaǵy terakt kezinde 35 adam qaza tapqany týraly habarlandy.
