Pákistandaǵy jarylys: 3 adam qaza taýyp, 15-i zardap shekti
NUR-SULTAN. QazAqparat – Sársenbi kúni Pákistannyń Karachı qalasyndaǵy kópqabatty turǵyn úıdiń ǵımaratynda bolǵan jarylys saldarynan kem degende úsh adam qaza taýyp, 15 adam zardap shekti. Bul týraly QazAqparat Doon gazetine silteme jasap habarlaıdy.
Basylym málimetinshe, ǵımarat qatty búlingen, sondaı-aq jaqyn mańda ornalasqan úıler men kólikterdiń terezeleri synǵan. Zardap shekkender aýrýhanaǵa jetkizildi.
Jergilikti polıtsııa qyzmetiniń málimetinshe, gaz ballony jarylǵan bolýy múmkin. Mamandar oqıǵa ornynda keleńsiz jaǵdaıdyń sebep-saldaryn anyqtap jatyr.
