Pákistandaǵy jarylys: 1 adam qaza taýyp, 9-y jaraqat aldy
NUR-SULTAN-KARAChI. QazAqparat – Pákistannyń ońtústik-batysyndaǵy Belýdjıstan provıntsııasynyń astanasy Kvetta qalasynda bazarda bolǵan jarylystan bir adam qaza taýyp, toǵyzy jaraqat alǵan, dep habarlaıdy QazAqparat Anadolu agenttigine silteme jasap.
Sońǵy aptadaǵy ekinshi jarylys shııt-hazar qaýymy múshelerine tıesili shaǵyn bazarda bolǵan. Bul týraly Anadolu agenttigine provıntsııanyń Іshki ister mınıstri Mır Zııa Langov habarlady.
Ázirge eshqandaı terrorıstik uıym lańkestik áreket úshin jaýapkershilikti óz moınyna alǵan joq, alaıda Lashkar-ı-Djangvı sýnnıttik sodyrlar toby óńirdegi hazar jamaǵatyna birazdan beri shabýyl jasap keledi.
Ótken aptada Kvettada polıtsııa ýchaskesiniń mańynda bolǵan jarylys saldarynan tórt adam mert bolyp, 20-dan astam adam zardap shekken edi.
Belýdjıstan provıntsııasy mys, myrysh jáne tabıǵı gazǵa baı strategııalyq mańyzdy óńir. Sońǵy on jyl ishinde provıntsııada, ásirese astanasy Kvettada lańkestik shabýyldar saldarynan 2200 adam qaza tapty.
Provıntsııanyń aýmaǵynan Qytaı-Pákistan ekonomıkalyq dálizi ótip jatyr. Jobanyń quny 64 mlrd AQSh dollaryn quraıdy. Ol Qytaıdyń soltústik-batysyndaǵy Sınsıan provıntsııasyn Belýdjıstandaǵy Gvadar portymen avtomobıl joldary, temirjol jáne júk, munaı jáne gaz tasymaldaý úshin qubyr jelilerimen baılanystyryp otyrýǵa arnalǵan.
600 shaqyrymdyq jaǵalaý jelisi bar Gvadar tereńde ornalasqan teńiz porty. Ol arqyly Qytaı Úndi teńizine tikeleı shyǵýdy kózdep otyr.
Bul ekonomıkalyq dáliz Qytaıǵa Afrıka men Taıaý Shyǵysqa jol ashyp qana qoımaı, Pákistanǵa tranzıttik qyzmet kórsetkeni úshin mıllıardtaǵan dollar ákeledi.
