Pákistandaǵy sý tasqynynan zardap shekkenderge Ózbekstan Úkimeti 40 tonna gýmanıtarlyq kómek jetkizdi
ASTANA. Tamyzdyń 25-i. QazAqparat - Ózbekstan tótenshe jaǵdaılar mınıstrligi Pákistandaǵy sý tasqynynan zardap shekkenderge 40 tonna gýmanıtarlyq kómek jetkizdi, - dep habarlaıdy respýblıkanyń Tótenshe jaǵdaılar mınıstrliginiń baspasóz qyzmetine silteme jasaǵan BNews aqparat agenttigi.
«Ózbekstan áýekompanııasynyń júk tasymaldaıtyn Il-76 ushaǵy 40 tonna gýmanıtarlyq júgimen dúısenbi kúni Pákistannyń Ravalpındı áýe bazasyna qondy», - delingen taratylǵan aqparatta.
Respýblıka TJM málimetteri boıynsha, 300 myń somalyq gýmanıtarlyq kómek kórpeler, palatkalar, aýyzsý, dári-dármekter, un men kúrish, balalar taǵamy men kıim-keshekterden turady.
Pákistan úkimetiniń málimetterinshe, eki aıda tabıǵı apattan qaza bolǵandar sany 1,6 myń adam bolyp, kem degende 20 mln. adam zardap shekti. Qazir Pákistan terrıtorııasynyń besten bir bóligi sý astynda qalyp otyr.
