Pákistandaǵy poıyzdar soqtyǵysy: qurbandar sany 62-ge jetti
ISLAMABAD. QazAqparat – Dúısenbi kúni Pákistannyń ońtústiginde eki jolaýshylar poıyzynyń soqtyǵysýy saldarynan kem degende 62 adam mert bolyp, 100-den asa adam zardap shekti. Bul týraly QazAqparat BOL News telearnasyna silteme jasap habarlaıdy.
Eldiń temirjol kóligi mınıstrliginiń málimetinshe, apat Sınd ońtústik provıntsııasyndaǵy Gotkı qalasynyń aýmaǵynda boldy. Poıyzdardyń bireýi relsten shyǵyp ketken, artynsha oǵan ekinshi quram soǵylǵan.
Qazirgi kezde soqtyǵysý bolǵan temirjol tarmaǵyndaǵy qozǵalys qaıta jandandy. Qutqarý operatsııasy jalǵasýda, oǵan Pákistan áskeri qatysýda.
Munyń aldynda GeoTV telearnasy kem degende 50 adamnyń mert bolǵany týraly habarlaǵan bolatyn.
