Pákistandaǵy aptap ystyqtan 120 adam ajal qushty
ASTANA. QazAqparat - Pákistanda kúnniń qatty ysýynan 120 adam ajal qushty. Jergilikti bılik te tabıǵattyń tosyn minezine qarsy tótep bere almaýda. Dárigerlerdiń de degbiri qashqan. Óıtkeni ajal qushqandar sany munymen toqtamaýy múmkin. Pákistannyń Karachı qalasy qara jamyldy, dep habarlady www.24.kz.
Júzden asa turǵyndy 45 gradýstyq ystyq jalmady. Sınd bıliginiń málimetinshe, negizinen aptaptan egde adamdar ajal qushýda. Dúıim jurtty dúrbeleńge salǵan mundaı jaıt sońǵy ret 1979 jyly tirkelgen eken.
Qazir aýrýhanalardaǵy mamandardyń barlyǵy aıaqtarynan tik turyp, qyzmet kórsetýde. Sońǵy 2 táýlikte ystyq ótken 700-den astam adam jedel jetkizilgen. Bılik dári-dármekke tapsyrysty kúrt kóbeıtti.
«Bizge jetkizilgen adamdardyń barlyǵynyń jaǵdaıy aýyr. Kópshiligi qaltyrap, sińirleri tartylýda. Ókinishtisi, bárin birdeı qutqaryp qalý múmkin bolmaı tur», - deıdi Jinah Hospital jedel-járdem bólimshesiniń basshysy Semı Jamalı.
Aýa raıy boljamyna sensek, jaqyn kúnderi shyjǵyrǵan ystyq basylady. Biraq jergilikti turǵyndarǵa kóshege shyqpaýǵa keńes berilýde.
