Pákistanda
ASTANA. 23 qyrkúıek. QazAqparat - Pákistandyq sheneýnikterdiń aıtýynsha, juma kúni sol elde "Musylmandardyń páktigi" fılmi men Muhammed paıǵambardyń karıkatýrasyna baılanysty ótken narazylyq aktsııalary barysynda keminde 16 adam mert bolǵan.
Bul týraly Azattyq habarlap otyr.
Pákistannyń ońtústigindegi Karachı qalasynda quqyq qorǵaý qyzmetkerleri men sherýshiler arasynda atys bolyp, saldarynan 12 adam mert bolǵan, olardyń arasynda bir polıtsııa ókili de bar. Soltústik-batys aımaqtaǵy Peshavar qalasynda sherýge shyqqandar eki kınoteatrdy órtep jibergen. Bul qalada qaza bolǵan úsh adamnyń bireýi jergilikti telekompanııanyń qyzmetkeri dep habarlandy.
Sondaı-aq, Lahor jáne Islamabad qalasynda AQSh pen Frantsııanyń dıplomatııalyq ókildikterine barmaqshy bolǵan narazy top polıtsııamen qaqtyǵysqan.
AQSh-ta túsirilgen "Musylmandardyń páktigi" fılmi men frantsýzdyq satıralyq jýrnalda jarııalanǵan Muhammed paıǵambardyń karıkatýrasy birqatar musylman elderinde narazylyqtyń órshýine sebep boldy.
Pákistandyq telearnadan AQSh prezıdenti Barak Obama men memlekettik hatshy Hılları Klıntonnyń musylmandar Muhammed paıǵambardy qorlaıdy dep sanaıtyn fılmdi aıyptap sóılegen sózderinen úzindiler berildi.
Frantsııa 20-dan astam memlekettegi elshilikterinde qaýipsizdik maqsatynda jumysty toqtatýǵa májbúr boldy.
