Pákistanda jol apatynan 13 adam qaza taýyp, 30-dan astamy zardap shekti
ISLAMABAD. Sınhýa-QazAqparat – Beısenbi kúni tańǵa qaraı Pákistannyń ońtústigindegi Sınd provıntsııasynyń Sýkkýr aýdanynda jolaýshylar avtobýsy aýdarylyp, kem degende 13 adam qaza tapty, taǵy 30-dan astamy zardap shekti, dep habarlaıdy QazAqparat Sınhýa agenttigine silteme jasap.
Sýkkýr aýdany polıtsııasynyń aǵa sýperıntendanty Irfan Samo tilshilerge avtobýstyń eldiń shyǵysyndaǵy Pendjab provıntsısynyń Mýltan qalasynan ońtústiktegi Sınd provıntsııasynyń astanasy Karachıge bara jatqanyn málim etti.
Jol-kólik apatynyń sebepterin tergeý amaldary bastaldy. Keıbir jergilikti BAQ-tyń derekkózderge silteme jasap habarlaýynsha, júrgizýshi burylysta kólikti basqara almaı qalǵan.
Zardap shekken adamdar Rorı aýdanyndaǵy aýrýhanaǵa jetkizildi. Aýrýhananyń medıtsınalyq sýperıntendanty Pervaız Ahtar BAQ-qa alty adamnyń oqıǵa ornynda kóz jumǵanyn, qalǵandary aýrýhanaǵa aparar jolda nemese aýrýhanada qaıtys bolǵanyn habarlady.
P.Ahtar zardap shekken alty adamnyń jaǵdaıy óte nashar ekenin qosyp ótti. Olardyń keıbireýleri aýdannyń basqa aýrýhanalaryna aýystyrylatyn bolady.
