Pákistanda jerleý rásimi kezinde jarylys boldy, qaza tapqandar bar
ASTANA. 11 naýryz. QazAqparat - Jeksenbi kúni Pákistandaǵy jerleý rásimi kezinde jarylys boldy, dep habarlaıdy Bı-Bı-Sı.
Sonyń saldarynan az degende 10 adam qaza taýyp, taǵy ondaǵany jaraqat aldy.
Jergilikti derekkózderdiń málimetteri boıynsha, eldiń soltústik-batysyndaǵy Peshavar provıntsııasyndaǵy qorymdardyń birinde jarylys zatyn jankeshti iske qosty.
«Bul jankeshtiniń shabýyly boldy - biz oqıǵa ornynan onyń súıekterin taptyq. Qazirgi kezde qaza tapqandardyń sany 12-ge jetti, 30-dan astam adam jaraqattandy», - dep málimdedi Pákistan polıtsııasynyń ókili Frans press agenttigine.
Ázirshe jergilikti ekstremıstik toptardyń eshqaısysy ózine jaýapkershilikti alǵan joq, biraq sońǵy ret osyndaı oqıǵalar úshin jaýapkershilikti bul aımaqta soıqan salyp júrgen ıslam sodyrlary moıyndaryna alǵan bolatyn.
