Pákistanda sý tasqynynan 33 mıllıonǵa jýyq adam zardap shekti

JENEVA. QazAqparat – Pákistannyń mıllıondaǵan turǵyndary qatty sý tasqynynan zardap shekti, myńnan astam adam kóz jumdy. Ǵımarattar, kópirler men joldar qırady. BUU pákistandyqtarǵa gýmanıtarlyq kómek kórsetý josparyn jarııalady. Ony júzege asyrý úshin 160 mln dollar qajet, dep habarlaıdy QazAqparat BUU Jańalyqtar ortalyǵyna silteme jasap.

«Pákistanda bolǵan «sońǵy onjyldyqtaǵy eń úlken sý tasqyny» saldarynan shamamen 33 mıllıon adam zardap shekti degen boljam bar. Elge nóser jańbyr jaýǵan kezde, ıaǵnı maýsym aıynyń ortasynan bastap apat myńnan astam adamnyń, negizinen balalardyń ómirin qıdy», - dedi Jenevada ótken brıfıngide BUU gýmanıtarlyq máselelerdi úılestirý basqarmasynyń ókili Iens Laerke.

«Pákistan azap shegýde», – dedi BUU Bas hatshysy Antonıý Gýterrısh osy elge arnaǵan beıneúndeýinde. Ol el turǵyndary buryn-sońdy bolmaǵan jańbyr men sý tasqynynan zardap shegip jatqanyn atap ótti.

Búgingi tańda Pákistandaǵy sý tasqyny saldarynan shamamen 500 myń adam úılerin tastap ketti, olardyń kópshiligi ýaqytsha lagerlerden pana tapty. Sý tasqyny mıllıonǵa jýyq turǵyn úılerdi qıratyp, zaqymdaǵan. 700 myń bas mal joǵalyp ketken.

Gýmanıtarlyq jaǵdaı kólik ınfraqurylymyna aıtarlyqtaı zalal keltirdi. Aldyn ala boljam boıynsha, 3500 shaqyrymǵa jýyq jol men 150 kópir búlingen.

Foto: news.un.org