Pákistanda sý tasqynynan 165 adam kóz jumdy
ISLAMABAD. QazAqparat – Pákistannyń tótenshe jaǵdaılarǵa qarsy kúres ulttyq basqarmasynyń málimetinshe, elde 14 maýsymnan beri jaýyp jatqan jaýyn-shashyn saldarynan 165 adam qaza taýyp, 171 adam jaraqat alǵan, dep habarlaıdy QazAqparat News CN agenttigine silteme jasap.
Eń kóp zardap shekken aımaq – Belýdjıstan provıntsııasy. Onda sý tasqynyn týdyrǵan nóser jańbyr saldarynan 65 adam qaza taýyp, 49 adam jaraqat alǵan.
Sý bógetteri buzylýynyń birneshe jaǵdaıy oryn alǵan, sonyń saldarynan ondaǵan úıler men ınfraqurylym buzyldy.
Sınd provıntsııasynda, sonyń ishinde bir aptadan astam ýaqytqa sozylǵan nóser jaýynnan zardap shekken Karachıde jekelegen apattardan 38 adam qaza tapty.
Eldiń klımattyń ózgerý máseleleri jónindegi mınıstri Sherrı Rehmannyń aıtýynsha, Sınd pen Belýdjıstanda jaýyn-shashyn 625% jáne 501% kóp.
Bul - 30 jyldyq ortasha kórsetkishten joǵary. Sońǵy 13 kún boıy eki provıntsııa da qatty mýssondyq qysymǵa ushyrady.
Tabıǵı apattarmen kúres jónindegi ulttyq basqarma málimetinshe, Haıber-Pahtýnhvada tolassyz jaýǵan jańbyr saldarynan 24, Pendjabta 23 jáne eldiń basqa aımaqtarynda 15 adam qaza tapty.
El boıynsha 1319 janýar qyrylǵan. 350-ge jýyq úı tolyǵymen qırap, 781 úı búlingen.
Bılik eldiń túkpir-túkpirinde qutqarý jumystaryn júrgizýde. Zardap shekkenderge shatyr, kórpe, moskıt torlary, azyq-túlik jáne qutqarý keýdesheleri taratylyp jatyr.
