Pákistanda sodyrlar stýdent qyzdar mingen avtobýsty jaryp jiberdi
ASTANA. 16 maýsym. QazAqparat - Búgin Pákistanda birneshe iri lańkestik aktiler oryn aldy. Sodyrlar stýdentter mingen avtobýsty jaryp jiberdi, sodan keıin jaralanǵandar jetkizilgen aýrýhanada jarylys jasady, dep habarlady Ýtro.rý.
«Kvetta qalasyndaǵy (Belýdjıstan provıntsııasynyń ortalyǵy) áıelder ýnıversıteti janyna qoıylǵan avtobýsta jarylǵysh qurylǵy iske qosyldy. Sonyń saldarynan keminde 11 qyz mert boldy, taǵy 22 adam zardap shekti, olardyń keıbireýleriniń haly aýyr.
Jaralanǵandar jergilikti aýrýhanaǵa jetkizildi, onda da jarylys jasaldy. Aýrýhana mańynda odan keıin atys boldy. Qaza bolǵandar men zardap shekkender týraly ázirge habarlanǵan joq.
Budan buryn búgin sodyrlar Belýdjıstandaǵy Pákistannyń negizin qalaǵan Muhammed Álı Djınniń rezıdentsııasyna shabýyl jasady. Olar úıdiń ishine qol granatalaryn laqtyryp, tarıhı ǵımaratty kúzetip turǵan polıtseıdi óltirgen. Shabýylǵa mototsıkl mingen tórt adam qatysqan. Sonyń saldarynan rezıdentsııadaǵy eski jádigerler joıyldy. Atap aıtqanda jıhazdar men Djınniń fotosýretteri , aǵashtan jasalǵan zattardyń bári órtendi.
Bul shabýylǵa jaýapkershilikti Belýdjıstannyń azattyq armııasynyń seperatısteri óz moınyna aldy, olar provıntsııanyń táýelsizdigi úshin kúresýde. Budan buryn osy jyldyń basynda Kvettada jarylys bolyp, 200-ge tarta adam mert bolǵan edi.
