Pákistanda sel tasqyny jańa óńirlerge yǵysýda
ASTANA. Tamyzdyń 26-sy. QazAqparat- Soltústikten yǵysqan sel tasqyny taǵy júzdegen pákistandyqty eldiń ońtústigindegi jaǵalaýdaǵy aýdandardaǵy óz úılerin tastap ketýge májbúrlep otyr, dep habarlaıdy VVS radıostansasy.
Sınd ýálaıatyndaǵy Tatta qalasynyń tóńireginde on shaqty aýyl sý astynda qalyp qoıdy, 200 myńdaı turǵyn qaýipsiz aımaqtarǵa kóshirildi. Bógetter ázirge sýdyń ekpinin ustap tur, biraq olarǵa jaryqtar túse bastaǵan. Eger sý bógetterdi shaıyp ketse, budan da kóp eldi meken sý tasqynda qalýy yqtımal.
Qutqarý qyzmetteri eldiń soltústiginde sýdyń beti qaıtqan aýmaqtardy tazalaý jumystaryna kirisip ketti. 800 myńdaı adam syrtpen baılanyssyz qalǵanyn budan buryn habarlaǵan bolatynbyz, olarǵa kómektesý úshin Birikken Ulttar Uıymy qosymsha tikushaqtar suratyp otyr.
5 mıllıondaı adam baspanasyz qaldy, olarǵa pana úshin shatyrlar nemese plastık qalqalar qajet. Tasqyn sýdan zardap shekken óńirlerde medıkter ınfektsııalyq aýrýlardyń, birinshi kezekte tyrysqaq pen ish ótý aýrýlarynyń taralýyna jol bermeýge tyrysýda.
BUU aqparaty boıynsha, Pákstanda qazirdiń ózinde 1,6 mıllıonǵa jýyq adam aýrýlarǵa shaldyqqan. «Tek qana sońǵy bir kúnniń ishinde 100 myńnan astam adam aýrýǵa shaldyǵyp otyr, olarǵa dári-dármek kerek», dep málim etti Dúnıejúzilik densaýlyq saqtaý uıymynyń ókili Pol Garvýd.
