Pákistanda saılaý ýchaskesindegi jarylystan 31 adam qaza tapty
ASTANA. QazAqparat - Pákistannyń Belýdjıstan provıntsııasyna qarasty Kvetta qalasynda jańkeshti lańkes jarylys uıymdastyrdy. Oqıǵa saldarynan 31 adam mert boldy, olardyń qatarynda bes polıtseı qyzmetkeri bolǵan. 30 adam jaraqat aldy, dep habarlaıdy QazAqparat tilshisi Times of Islamabad-qa silteme jasap.
Polıtsııanyń derekkózderine sáıkes, jarylys patrýldik polıtsııa avtokóliginiń janynda bolǵan. Dál sol ýaqytta halyq Pákistandaǵy daýys berý úshin saılaý ýchaskesiniń aldynda kezekte turǵan. Quqyqqorǵaý organdarynyń qyzmetkerleri oqıǵa bolǵan aımaqty qorshap alyp, tergeý jumystaryn bastap ketti.
Aıta keteıik, búgin, 25 shilde kúni Pákistanda Ulttyq assambleıa men provıntsıaldyq assambleıaǵa saılaý bastaldy. Alaıda terrorlyq aktiler men depýtattyqqa úmitkerlerge jasalǵan shabýyldar saılaýaldy naýqannyń shyrqyn buzdy.
