Pákistanda prezıdenttik saılaýdyń ótetin merzimi belgili boldy
ASTANA. QazAqparat - Pákistanda prezıdenttik saılaý 2018 jylǵy 4 qyrkúıekte ótetin boldy, dep habarlaıdy Anadoly agenttigi Pákistannyń Saılaý komıssııasyna silteme jasap.
Úmitkerlerdiń saılaýǵa qatysý týraly ótinishteri jergilikti ýaqyt boıynsha 27 tamyz kúni saǵat 12:00-ge deıin qabyldanady.
Ótinishterdi qarastyrý protsesi 29 tamyzǵa deıin jalǵasyp, Saılaý komıssııasy qabyldaǵan sheshimin 30 tamyzda jarııalaıdy.
Pákistannyń Konstıtýtsııasyna sáıkes, eldegi prezıdent saılaýy parlamenttik saılaý ótken soń bir aıdan keıin nemese qazirgi memleket basshysynyń prezıdenttik ókilettiligin doǵarǵanǵa deıin bir aı buryn ótkiziledi.
