Pákistanda prezıdent saılaýy ótip jatyr
ASTANA. QazAqparat - Seısenbi kúni Pákistanda 13-shi prezıdent saılaýy bastaldy, dep habarlaıdy «QazAqparat» HAA Geo TV telearnasyna silteme jasap.
Saılaý parlamentte jáne tórt provıntsıaldyq assambleıada 10:00-den 16:00-ge deıin jalǵasady. Onyń qorytyndysyn Ortalyq saılaý komıssııasy saılaý ótken kúnniń ózinde jarııalaıdy.
Memleket basshysy laýazymyna úsh kandıdat usynylǵan. Olar: Ádilet úshin qozǵalys bıleýshi partııasynyń ókili Arıf Alvı, Pákistan halyq partııasynan usynylǵan kandıdat Aıtzaz Ahsan jáne oppozıtsııa ókili Fazl-ýr-Rehman.
Qazirgi prezıdent, Pákistan musylmandary lıgasy partııasynyń ókili Mamnýn Hýseın ekinshi merzimge óziniń kandıdatýrasyn usynýdan bas tartty.
Aıta ketken jón, Pákistan prezıdentin federaldyq parlamenttiń tómengi jáne joǵary palatasynyń, sondaı-aq eldiń tórt provıntsııasy Zań shyǵarýshy jıyndarynyń 1174 depýtatynan quralǵan saılaýshylar alqasy saılaıdy.
