Pákistanda prezıdent saılaýy bastaldy
ASTANA. QazAqparat - Seısenbi kúni Pákistanda 13-shi prezıdent saılaýy bastaldy, dep habarlaıdy QazAqparat Geo TV telearnasyna silteme jasap.
Saılaý parlamentte jáne tórt provıntsııalyq assambleıada 10:00-den 16:00-ge deıin jalǵasady. Onyń qorytyndysyn Ortalyq saılaý komıssııasy saılaý ótken kúnniń ózinde jarııalaıdy.
Memleket basshysy laýazymyna úsh kandıdat usynylǵan, olar: «Ádilet úshin qozǵalys» bıleýshi partııasynyń ókili Arıf Alvı, «Pákistan halyq partııasynan» usynylǵan kandıdat Aıtzaz Ahsan jáne oppozıtsııa ókili Fazl-ýr-Rehman. Qazirgi prezıdent, Pákistan musylmandary lıgasy partııasynyń ókili Mamnýn Hýseın ekinshi merzimge saılanýdan bas tartqan.
Pákistan prezıdentin federaldyq parlamenttiń tómengi jáne joǵarǵy palatasynyń, sondaı-aq eldiń tórt provıntsııasy Zań shyǵarýshy jıyndarynyń 1174 depýtatynan quralǵan saılaýshylar alqasy saılaıdy.
