Pákistanda lańkestik árekettiń saldarynan 17 adam opat boldy, 40 adam jaralandy
ASTANA. Qyrkúıektiń 6-sy. QazAqparat - Búgin Pákistannyń soltústik-batysyndaǵy eldi mekenderdiń birinde polıtsııa ýchaskesine jasalǵan lańkestik shabýyldyń saldarynan, naqtylanǵan málimetter boıynsha 17 adam qaza bolyp, 40-tan astam adam jaralanǵan, dep habarlaıdy «Azattyq» radıosy.
Jergilikti polıtsııanyń aqparaty boıynsha, jankeshti Makkı-Marýat qalasyndaǵy polıtsııa ýchaskesiniń qaqpasyna baryp soǵylǵan. Qaza tapqandardyń kóbisi - polıtsııa qyzmetkerleri, biraq ta qurbandardyń arasynda azamattyq tulǵalar, tipti balalar da bar.
Bul Pákistanda sońǵy aptada jasalyp otyrǵan úshinshi iri lańkestik áreketi. Ótken aptada Lahor jáne Kvetta qalalarynda oryn alǵan lańkestik shabýyldardyń saldarynan 100-ge jýyq adam opat bolǵan edi.
