Pákistanda eks-premer Navaz Sharıftiń qyzy tutqyndaldy
NUR-SULTAN. QazAqparat – «Pákistan musylman lıgasy» oppozıtsııalyq partııasynyń basshysy, eldiń burynǵy premer-mınıstri Navaz Sharıftiń qyzy Marıam Navaz tutqyndaldy. Bul týraly beısenbi kúni Reuters agenttigi partııanyń resmı ókili Marıam Aýrangzebke silteme jasap habarlady.
«Marıam Navaz tutqyndaldy. Sybaılas jemqorlyqqa qarsy is-qımyl ulttyq bıýrosy ony Lahorda ustady. Onyń ne sebepti ustalǵanyn bizge habarlaǵan joq», - dep málimdedi Aýrangzeb.
2018 jyldyń 24 jeltoqsanynda Pákistannyń burynǵy premer-mınıstri Navaz Sharıf jemqorlyq jasady dep aıyptalyp, jeti jylǵa qamaldy. Onyń qyzy Marıam Navaz da jemqorlyq jasady degen kúdikke ilindi. 2018 jyly ol qamaýǵa alyndy, alaıda sottyń úkimi shyqqanǵa deıin bosatylǵan edi.
