Pákistanda balalar 274 metr bıiktegi arqanjolda qalyp qoıǵan

ISLAMABAD. QazAqparat – Pákistanda eldiń soltústik-batysynda 900 fýt bıiktikte (274 metr) arqanjolda qalyp qoıǵan alty bala men eki eresek qutqarylyp jatyr. Qutqarýshylardyń aıtýynsha, kótergishtiń bir arqany úzilip ketken, dep habarlaıdy QazAqparat CNN-ge silteme jasap.

Pákistannyń ulttyq tabıǵı apattarmen kúres basqarmasynyń (NDMA) málimetinshe, arqanjolda qalyp qoıǵan balalar Haıber-Pahtýnhva provıntsııasyna mektepke bara jatqan. Olardy qutqarý úshin tikushaq tartyldy.

Buǵan deıin jergilikti úkimet ókili eresektermen birge segiz bala 1200 fýt (365 metr) bıiktikte qalyp qoıǵanyn málimdedi.

Bılik barlyq «tozyǵy jetken jáne talapqa sáıkes kelmeıtin arqanjoldardy» tez arada jabýdy buıyrdy.

Haıber-Pahtýnhva provıntsııasynyń shalǵaıdaǵy jáne taýly aýdandarynda turatyn kóp bala mektepke arqanjolmen barady.

Keıbir kótergishte turaqty tehnıkalyq qyzmet kórsetý júrgizilmegeni atalyp ótildi.