Pákistanda áskerı ushaq qulap, 18 adam qaza boldy
RAVALPINDI. QazAqparat – Pákistannyń Ravalpındı qalasynyń shetindegi Mora Kalý eldi mekeninde áskerı ushaq qulap, kem degende 18 adam opat boldy.
Qaza tapqandardyń beseýi – ekıpaj músheleri, dep habarlaıdy «QazAqparat» HAA The News International saıtyna silteme jasap.
Qaıǵyly oqıǵa seısenbiniń tańynda bolǵan.
Pákistan armııasy baspasóz qyzmetiniń málimdeýinshe, shaǵyn áskerı ushaq synaq kezinde apatqa ushyraǵan. Ushaq qulaǵan jerde alapat órt shyǵyp, sol mańdaǵy úıler otqa oranǵan.
Apat sebepteri anyqtalyp jatyr.
Qutqarýshylardyń aıtýynsha, ushaq turǵyn úılerdiń ústine qulaǵan. Úıindilerdiń astynan 18 adamnyń denesi shyǵaryldy.
Taǵy 12 adam jaraqat alǵan. Olardyń barlyǵy Ravalpındıdiń Holy Family jáne DHQ aýrýhanalaryna jetkizilgen. Tekserý úshin qaza tapqandardyń denesi de sonda jiberilgen.
Eske sala keteıik, Pákistandaǵy eń jantúrshigerlik ushaq apaty 2010 jyly bolǵan. Sol kezde Karachıden shyqqan Airbus 321 laıneri Islamabad mańyndaǵy qyrǵa tumsyǵymen qadalǵan edi. Apat saldarynan ushaq bortyndaǵy 152 adamnyń biri qalmaı qaza tapqan.
