Pákistanda áskerı avtokolonnany jaryp jiberdi: 20 sarbaz qaza tapty
ASTANA. 19 qańtar. QazAqparat - Pákistandaǵy áskerılendirilgen avtokolonnanyń jarylýy nátıjesinde 20-ǵa jýyq áskerı qyzmetshi qaza tapty, dep habarlady RBK. 30-dan astam adam jaraqat aldy.
Avtokolonnaǵa shabýyl Aýǵanstan shekarasynda ornalasqan Soltústik Vazırıstan óńirindegi Banný qalasyna kireberis jerde bolǵan. Oqıǵa ornyn polıtseıler jarylys sebepterin anyqtaý úshin qorshaýǵa aldy.
Shabýylǵa jaýapkershilikti pákistandyq tálibter óz moıyndaryna aldy. Qozǵalys ókilderi budan buryn qaýipsizdik kúshine shabýyldy kúsheıtetindikterin málim etken bolatyn.
17 qańtarda Pákistanmen kórshi Aýǵanstanda iri lańkestik oryn aldy. Kabýldyń dıplomatııalyq aýdanynda lańkes ádette sheteldikter men úkimettik sheneýnikter baratyn meıramhananyń kireberisinde jarylǵysh qondyrǵyny iske qosqan. Jarylystan keıin eki lańkes meıramhana qonaqtaryna oq jaýdyrǵan. Sońǵy derekter boıynsha, 21 adam qaza tapqan. Ajal qushqandardyń kópshiligi - sheteldikter. Reseı SІM derekteri boıynsha Aýǵanstanǵa járdemdesý jónindegi mıssııa qyzmetkeri reseılik Vadım Nazarov shabýyl qurbanyna aınaldy. Óz tarapynan mert bolǵandar týraly Halyqaralyq valıýta qory men BUU da málimdep otyr. «Talıban» qozǵalysy oryn alǵan teraktige baılanysty jaýakershilikti óz moıyndaryna aldy.
