Pákistanda 220 mln adam elektr jaryǵynsyz otyr

AMMAN. QazAqparat – Dúısenbi kúni tańerteń Pákistandaǵy elektr jelilerindegi úlken apattan búkil elde jaryq óshken, dep habarlaıdy QazAqparat tilshisi Pákistan Energetıka mınıstrligine silteme jasap.

Mınıstrlik dúısenbide jergilikti ýaqyt boıynsha tańǵy saǵat 7:34-te eldiń ulttyq jelisi elektr jelileriniń durys jumys istemeýine baılanysty isten shyqqanyn, «elektr jelisinde keń aýqymdy aqaý týǵanyn» habarlady.

«Júıege tehnıkalyq qyzmet kórsetý jumystary júrip jatyr» delingen habarlamada.

El astanasy Islamabadta, ońtústiktegi Karachı port qalasynda, eldiń shyǵysyndaǵy Lahor qalasynda jáne Peshavardyń soltústiginde jaryq óshken.

Elektr qýatynyń úzilýinen shamamen 220 mıllıon adam jaryqsyz otyr, dep habarlaıdy ANI.

Quetta Electric Supply Company (QESCO) málimeti boıynsha Gýddýdan Kvettaǵa deıin eki elektr jelisi ajyraǵan. Kompanııa Belýdjıstannyń 22 aýdanynda, sonyń ishinde Kvettada elektr qýaty bolmaıtynyn aıtqan.

Soltústik Pákistannyń Balýchıstan provıntsııasynda aýrýhanalarda, bazarlarda jáne úılerde elektr qýaty úzilgen.

Keıinirek Energetıka mınıstrligi Islamabad astanasy men Peshavar qalasynda «jelilerdiń shekteýli sany» qalpyna kelgenin habarlady.

El ekonomıkasy kóptegen máselemen, sonyń ishinde aýyr energetıkalyq daǵdaryspen kúresti jalǵastyryp jatyr.

Pákistannyń suranysty qanaǵattandyrý úshin belgilengen qýaty jetkilikti, biraq óziniń munaı elektr stansalaryn paıdalanýǵa resýrsy jetpeıdi, dep habarlady AlArabiya.

Pákistan úkimeti osy aıdyń basynda energııa únemdeýdiń jańa josparyn jarııalady.

Premer-Mınıstr Shehbaz Sharıf barlyq federaldy vedomstvolarǵa energııa tutynýdy 30%-ǵa qysqartýdy, al onyń úkimeti búkil bazarlardy 20:30-da, al meıramhanalardy 22:00-de jabýdy buıyrdy.

Foto: twitter.com/ani_digital