20:59, 28 Sáýir 2020 | GMT +6
Pákistan Úkimeti Qazaqstan Elshiligine koronavırýsqa qarsy dári-dármekti tabystady
ISLAMABAD. QazAqparat - Pákistan Islam Respýblıkasynyń Úkimeti Qazaqstan Respýblıkasynyń Islamabadtaǵy Elshiligine koronavırýs indetin emdeý kezinde paıdalanylatyn gıdroksıhlorohınniń 60 myń tabletkasyn tabystady. Bul týraly QR Syrtqy ister mınıstrliginen málim etti, dep habarlaıdy QazAqparat.
«Dári-dármekter jýyq arada Nur-Sultan qalasyna jetkiziledi jáne medıtsınalyq mekemeler arasynda taratý úshin biryńǵaı dıstrıbıýtor – «SQ-Farmatsııa» JShS-ǵa tabystalady.
QR Syrtqy ister mınıstrligi baýyrlas Pákistan halqy men úkimetine dostyq nıeti men ısharaty úshin alǵys bildiredi jáne bul elderimiz arasyndaǵy yntymaqtastyq rýhyna sáıkes keledi», - delingen mınıstrlik málimetinde.
Eske salaıyq, Qazaqstan Prezıdenti Qasym-Jomart Toqaev Qazaqstanǵa gýmanıtarlyq kómek retinde koronavırýsqa shaldyqqan naýqastardy emdeýge arnalǵan dári usynǵany úshin Pákistan Úkimetine jáne Premer-mınıstr Imran Hanǵa alǵys bildirgen bolatyn.
