Pákistan shaıynan densaýlyqqa zııan boıaý tabyldy

ASTANA. QazAqparat - Quramynan zııandy boıaýlar men zeń tabylǵandyqtan Qazaqstan Pákistan shaıyn kirgizýge tyıym saldy, dep habarlaıdy QazAqparat QR Densaýlyq saqtaý mınıstrliginiń Qoǵamdyq densaýlyǵyn saqtaý komıtetiniń baspasóz qyzmetine silteme jasap.

«QR Densaýlyq saqtaý mınıstrliginiń Qoǵamdyq densaýlyq saqtaý komıteti Pákistanda óndirilgen shaıdyń Keden odaǵynyń «Azyq-túlik ónimderiniń qaýipsizdigi týraly», «Azyq-túlik ónimderin markalaý talaptary», «Azyq-túlik qospalarynyń, ıistendirgishterdiń jáne tehnologııalyq qosalqy zattardyń qaýipsizdik talaptary» sııaqty tehnıkalyq reglamentterine jaýap bermeıtindigi anyqtaldy», - delingen habarlamada.

Vedomstvonyń málimdeýinshe, Pákistanda jasalǵan: «Al Barkat» (óndirýshi - «A.A. Mughal General Traders»), «Gajjal's Tea» (óndirýshi - KPK «Gajjal's»), «Allama» (óndirýshi - «MTI medical Pvt»), «Pac Tea» (óndirýshi - «Zaib-un-Nisa street Sadar Karachi») jáne «Allied Tea» (óndirýshi - «S.I.T.E. Karachi») shaılarynan sıntetıkalyq boıaýlar tabylǵan.

Budan tys, «Al Barkat» shaıyndaǵy zeń normadan 10 ese, «Gajjal's Tea» shaıynda 2-4 ese artyq ekeni anyqtaldy.

Sondaı-aq pákistandyq shaı tańbalaý talaptaryna da saı emes: ónimniń shyǵarylǵan kúni, óndirýshiniń ataýy jáne ornalasqan jeri, EAS (eýrazııalyq sáıkestik) biryńǵaı belgisi kórsetilmegen.

Komıtet qazirgi kezde joǵaryda atalǵan ónimderdi tárkileý jáne joıý sharalaryn júrgizip jatyr.