Pákistan prezıdenti, premer-mınıstri jáne SІM basshysy ushaq apatyna baılanysty kóńil aıtty

ISLAMABAD. QazAqparat – Pákistannyń Prezıdenti Arıf Alvı, osy eldiń premer-mınıstri Imran Han jáne syrtqy ister mınıstri Shah Mehmýd Kýreshı Almaty mańynda bolǵan ushaq apatyna baılanysty kóńil aıtty, dep habarlaıdy QazAqparat Pákistan syrtqy ister mınıstrliginiń resmı saıtyna silteme jasap.

Prezıdent, premer-mınıstr jáne syrtqy ister mınıstri Almaty mańynda 12 adam mert bolǵan jáne birneshe ondaǵan jan zardap shekken ushaq apatyna baılanysty kóńil aıtty.

Kóńil aıtý habarlamasynda Pákistan prezıdenti pen premer-mınıstri Qazaqstan halqy men úkimetine ózderiniń orny tolmas qaıǵyǵa ortaqtasatyndyǵyn jetkizgen. Apattan zardap shekkender men jaralanǵandardyń tezirek saýyǵyp ketýine tilektestikterin bildirgen.

Aıta keteıik, keshe tańǵy mezgilde Almatydan Nur-Sultan qalasyna ushyp shyqqan ushaq radardan joǵalyp ketti.

Keıin 95 jolaýshysy jáne 5 ekıpaj múshesi bar ushaqtyń apatqa ushyraǵany málim boldy.

Oqıǵanyń mán-jaıyn anyqtaý úshin ushaq qulaǵan aýmaqqa arnaıy komıssııa ushyp shyqty.

QR Prezıdenti Qasym-Jomart Toqaev ushaq apatyna kináliler zańǵa sáıkes qatań jazalanatynyn málimdedi.

Elbasy Nur-Sultan Nazarbaev jolaýshylar ushaǵynyń apatqa ushyraýyna baılanysty kóńil aıtty.