Pákistan poıyzyndaǵy órt: Qaza bolǵandar sany 60-tan asty
ISLAMABAD. APP - QazAqparat – Búgin tańerteń Pákistanda júrdek poıyzda tutanǵan órtten mert bolǵandar sany 60 adamnan asty, dep habarlaıdy QazAqparat APP-ǵa silteme jasap.
Álemdik BAQ-tardyń jazýynsha, qazirgi ýaqytta órtten qaza tapqandar 64 adamdy qurap otyr. Budan buryn 25-ke jýyq jolaýshy qaza taýyp, 30-y zardap shekkenin habarlaǵan edik.
El prezıdenti Arıf Alvı men premer-mınıstr Imran Han Karachıden Ravalpındıge bet alǵan poıyzdan shyqqan órtten kóptegen adamnyń qaza tabýyna baılanysty kóńil aıtty. Oqıǵa Lıakatpýr qalasynda boldy.
Premer-mınıstr quzyrly bılik organdaryna oqıǵadan zardap shekkenderge shuǵyl jáne sapaly medıtsınalyq kómek kórsetýdi tapsyrdy.
APP málimetinshe, órt jolaýshylar ózderine tańǵy as ázirlep jatqan kezde gaz ballonynyń jarylýynan shyqqan. Jalyn ekonom-sanattaǵy eki vagondy jáne bıznes-sanattaǵy bir vagondy sharpyǵan.
