Pákistan «Musylmandardyń kinásizdigi» fılmine baılanysty YouTube-tiń jumysyn toqtatty
ASTANA. 19 qyrkúıek. QazAqparat - Pákistan Úkimetiniń tóraǵasy Radja Pervez Ashraf elde YouTube beıne portalyna qoljetimdilikti buǵattap tastaýǵa ókim berdi.
Onyń sebebi kúlli musylman «dindi qorlaý» dep túsingen rejısser Sem Beısıldiń «Musylmandardyń kinásizdigi» fılmi saıtqa shyǵyp ketken. Bul týraly Bnews.kz habarlaıdy.
Úkimet basshysynyń buıryǵy Pákistan Aqparat mınıstrliginiń qaraýyna kelip tústi, sheneýnikter tapsyrmany shuǵyl oryndady. Endi respýblıka aýmaǵynan YouTube-ke kirgisi kelgen qoldanýshy «saıt ádepsiz materıaldardy» jarııalaıdy degen jazýdy kóredi.
Pákistan premer-mınıstri mundaı sheshimdi YouTube basshylyǵy musylmandardyń ótinishin oryndap, daýly fılmdi hostıngten alyp tastaýdan bas tartqannan keıin qabyldap otyr.
Esterińizge sala keteıik, «Musylmandardyń kinásizdigi» kartınasynyń shyǵýy Lıvııa, Mysyr, Týnıs, Iemen jáne Sýdan sııaqty musylman elderinde dıplomatııalyq ókildikterge qarsy aktsııalardyń bastalýyna túrtki boldy. Ashýǵa býlyqqan musylmandar Lıvııadaǵy AQSh elshiligine basa-kóktep kirip, amerıkalyq elshi men Memlekettik departamenttiń úsh qyzmetkerin óltirdi. Osydan keıin batys elderiniń dıplomatııalyq ókildikterinde qaýipsizdik sharalary kúsheıtildi.
