Pákistan mıgranttar qazasynan keıin adam saýdasymen aınalysqan 10 adamdy qamaýǵa aldy

ASTANA. QazAqparat – Pákistan bıligi Grekııa jaǵalaýynda sýǵa batyp ketken ondaǵan mıgranttyń kóbi Islam Respýblıkasynan shyqqany belgili bolǵannan keıin adam saýdasymen aınalysty degen 10 adamdy qamaýǵa aldy, dep habarlaıdy QazAqparat DW agenttigine silteme jasap.

Olardyń aıtýynsha, toǵyz adam Kashmırdiń Pákistanǵa qaraıtyn bóliginen ustalǵan, qurbandardyń kópshiligi sol jerden shyqqan.

Taǵy bireýi AFP agenttigi atap ótkendeı, uzaq ýaqyt boıy mıgranttardy tasymaldaýǵa arnalǵan alańǵa aınalǵan Gýdjarat qalasynan tabyldy.

«Qazirgi ýaqytta olar búkil protsesti jeńildetýge qatysqany úshin tergelip jatyr», - dedi sheneýnikterdiń biri.

Jergilikti BAQ Grekııanyń Peloponnes túbeginiń mańynda apatqa ushyraǵan mıgranttary bar balyq aýlaý kemesinde Pákistannyń 300-ge jýyq azamaty bolǵanyn jazady.

Halyqaralyq kóshi-qon uıymy men BUU Bosqyndar isteri jónindegi Joǵarǵy komıssarynyń birlesken málimdemesinde bortta barlyǵy 400-den 750-ge deıin adam bolǵan dep boljanǵan.

Pákistannyń Syrtqy ister mınıstrligi senbide eldiń 12 azamaty aman qaldy dep habarlady, biraq vedomstvoda qaıyqta qansha adam bolǵandyǵy týraly aqparat joq.

Pákistan premer-mınıstri Shahbaz Sharıf 19 maýsymdy Jerorta teńizinde qaza tapqan mıgranttar úshin ulttyq aza tutý kúni dep jarııalady.

Sondaı-aq ol «qatań jazaǵa tartylatynyn» aıtyp, kontrabandashylardyń áreketin dereý toqtatýdy buıyrdy.

Buǵan deıin Grekııada keme apatynan qaza tapqandar sany 80-ge jetkenin jazǵan bolatynbyz.