Pákistan Qazaqstanmen yntymaqtastyqty arttyrýǵa nıetti

ASTANA. QazAqparat - Qazaqstannyń Pákistan Islam Respýblıkasyndaǵy Elshisi Barlybaı Sadyqov PIR Premer-mınıstri Shahıd Hakkan Abbasımen kezdesti. Kezdesý barysynda ekijaqty ózara is-qımyldardyń aǵymdaǵy jaǵdaıy men keleshegi týraly máseleler talqylandy, dep habarlaıdy QR SІM baspasóz qyzmeti.

B.Sadyqov Pákistannyń Úkimet basshysyn  Prezıdent Nursultan Nazarbaevtyń bastamalarymen, atap aıtqanda «Tórtinshi ónerkásiptik revolıýtsııa jaǵdaıynda damýdyń jańa múmkindikteri» atty Qazaqstan halqyna joldaýymen jáne «Bes áleýmettik bastamasymen» tanystyrdy.

Sonymen birge, 2050 jylǵa deıin ekonomıkasy barynsha damyǵan ozyq 30 memlekettiń qataryna kirý maqsatynda «Qazaqstan-2050», «Tsıfrly Qazaqstan» jáne t.b. strategııalyq qujattar men baǵdarlamalar júzege asyrylyp jatqanyn jetkizdi. Sondaı-aq, «Nurly Jol» atty kóliktik-logıstıkalyq baǵdarlama belsendi túrde júzege asyrylyp jatqanyn aıtty. Osyǵan oraı, Qazaqstan Pákistannyń Karachı, Gvadar teńiz kemejaılarynyń múmkindikteri men ınfraqurylymdaryn barynsha paıdalanýǵa qyzyǵýshylyq bildirýde.

Premer-mınıstr óz kezeginde Islamabad Qazaqstanmen dostyq qatynastardy damytýǵa erekshe nazar aýdaratynyn aıtty. Sondaı-aq, Pákistannyń Qazaqstanmen kólik, saýda, energetıka, ınvestıtsııa sııaqty salalar boıynsha yntymaqtastyqty arttyrýǵa úlken qyzyǵýshylyq tanytyp otyrǵanyn málimdedi.   

Sonymen birge, PIR Premer-mınıstri júzege asyrylyp jatqan qytaı-pákistan ekonomıkalyq dálizi sheńberinde erkin ekonomıkalyq aımaqtarynyń qurylǵanyn jáne oǵan Qazaqstan tarapynyń nemese úshinshi memlekettiń ártúrli jobalardy júzege asyra otyryp, oǵan qatysa alatyndary jóninde atap ótti.

Pákistan Premer-mınıstri Qazaqstan basshylyǵyna, bizdiń memleketimizdiń halqyna jyly lebiz, tilekterin joldady.