Pákistan ǵaryshqa alǵashqy ǵaryshkerin ushyrmaqshy

ASTANA. QazAqparat - Pákistan Qytaıdyń kómegimen 2022 jyly orbıtaǵa óziniń alǵashqy ǵaryshkerin jiberýi múmkin, dep habarlaıdy QazAqparat tilshisi álemdik BAQ-qa silteme jasap. 

Bul týraly jýrnalısterge Pákistannyń aqparat mınıstri Favad Choýdhrı Pákistan premer-mınıstri Imran Hannyń QHR-ǵa jasaıtyn sapary aldynda málim etti, dep habarlaıdy Times of India gazeti.

Pákistan aqparat mınıstri Qytaı men Pákistan arasynda ǵarysh salasyndaǵy yntymaqtastyq týraly kelisimge qol qoıylǵanyn atap ótti.
«Islamabadtyń pákistandyqty alǵash ǵaryshqa ushyrýy týraly nıeti Pákistannyń qarsylasy - Úndistannyń 2022 jyly orbıtaǵa ózdiginen alǵashqy ulttyq basqarylatyn mıssııany jiberetinin jarııalaýyna baılanysty bolýy múmkin. Osylaısha, Islamabad ǵarysh salasynda Nıý-Delıdiń aldyn oramaqshy», dep boljap jatyr Úndistannyń baspasóz quraldary.

Eske salaıyq, ótken aptada QR Qorǵanys jáne aeroǵarysh ónerkásibi mınıstri B. Atamqulov Qytaı Halyq Respýblıkasynyń Qazaqstandaǵy Tótenshe jáne Ókiletti elshisi Chjan Sıaomen kezdesti.

Kezdesý barysynda ekijaqty seriktestiktiń áskerı-tehnıkalyq jáne ǵarysh, kıberqaýipsizdik salalaryndaǵy túrli qyrlary talqylanǵan edi.