Pákistan azamatshasy amerıkan áskerlerine shabýyl jasaǵany úshin kináli dep tanyldy
ASTANA. Aqpannyń 4-i. QazAqparat - Nıý-Iork soty Pákistan azamaty 37 jastaǵy Aafııa Sıddıkı hanymdy 2008 jyldyń jazynda Aýǵanstanda AQSh-tyń Federaldyq tekserý bıýrosynyń qyzmetkerleri men áskerılerine qastandyq jasaǵany úshin kináli dep tanydy.
Bul týraly «Azattyq» radıosy habarlaıdy.
Sıddıkı hanym ol kezde «Ál-Kaıedamen» baılanysy bar degen kúdikpen ustalǵan bolatyn. Ol ózinen jaýap alý kezinde áskerı qyzmetkerlerdiń biriniń qarýyn tartyp alyp, olarǵa oq ashqan. Amerıkandyqtardyń eshqaısysy zardap shekpegen, al Sıddıkı hanym jaralanǵan.
Sıddıkı óziniń kináli emes ekenin aıtýda. Ol, tutqyndary azaptalatyn qupııa túrmede ustalyp kelgenin málim etti.
