Pákistan aqparattyq salada Qazaqstanmen yntymaqtasýǵa múddeli - Elshi
ASTANA. QazAqparat - Elordadaǵy Ortalyq kommýnıkatsııalar qyzmetinde ótken «Medıaseriktestik: Qazaqstan men Pákistan» taqyrybyndaǵy dóńgelek ústel barysynda taraptar eki eldiń arasyndaǵy aqparattyq, mádenı-gýmanıtarlyq salalardaǵy yntymaqtastyqty damytý máselelerin talqylady, dep habarlaıdy QazAqparat tilshisi.
Sharaǵa qatysýshylar aldynda sóz sóılegen Pákistannyń Qazaqstandaǵy Tótenshe jáne Ókiletti Elshisi Abdýl Salık Han óz eliniń aqparattyq salada Qazaqstanmen yntymaqtastyqty damytýǵa múddelik tanytyp otyrǵandyǵyn basa aıtty. Osy rette ol qazaqstandyq delegatsııanyń sapary eki eldiń arasyndaǵy aqparattyq, mádenı-gýmanıtarlyq salalardaǵy yntymaqtastyqty damyta túsetindigine senim bildirdi.
Ol Pákistan men Qazaqstandy mádenı, geografııalyq jáne tarıhı mura ortaqtyǵy biriktire túsetindigin atap ótti. Osy turǵyda Abdýl Salık Han eki eldiń BAQ ókilderi delegatsııalarynyń mádenı alys-berisin jandandyrýy úshin bir-birlerine saparlaýyna qyzyǵýshylyq tanytatyndyqtaryn bildirdi. Osy oraıda Pákistan Elshisi qazaqstandyq telearnalarda óz elinde túsirilgen teleserıaldardy qazaq tilinde, al qazaqstandyq teleserıaldardy ýrdý tilinde kórsetýdi usyndy.
«Jýrnalıster arasyndaǵy taǵlymdamany keminde jylyna eki ret ótkizý, jýrnalısterge arnalǵan birlesken oqytý trenıngter júrgizý, elderimizde jańalyqtardyń taralýyn qamtamasyz etý, yntymaqtastyq maqsatynda qazaqstandyq-pákistandyq BAQ qaýymdastyǵyn qurý qajet. Sońǵy usynys - Pákistanda «QazAqparat» halyqaralyq aqparat agenttigi keńsesin qurý.Keleshekte bul keńseni qurýǵa kómek berýge biz daıynbyz», - dedi Abdýl Salık Han.
