Pák qyzdardyń tizimi: Mınıstr stýdentterdiń jeke derekteri qalaı tarap ketkenin túsindirdi

ASTANA. KAZINFORM – QR Ǵylym jáne joǵary bilim mınıstri Saıasat Nurbek Almatyda stýdent qyzdardyń jeke derekteri qalaı tarap ketkenin aıtty. 

«Bul jaǵdaı boıynsha quqyq qorǵaý organdaryn tarta otyryp, sotqa deıingi tergeý amaldary jalǵasyp jatyr. Negizi jeke málimetti taratpaý turǵysynda medıtsına ortalyǵy qyzmetkeriniń qateligi bolǵan. Fızıka-tehnıka fakýltetinde týberkýlezdi jáne basqa da aýrýlardy anyqtaý úshin mindetti flıýorografııadan ótpegen stýdentterdiń belgili bir sany boldy. Medıtsına ortalyǵynyń qyzmetkeri flıýorografııadan ótpegen stýdentterdiń tizimin jibergen, sondaı-aq ol sonyń ishinde qosymsha medıtsınalyq aqparat jazylǵan derekterdi alyp tastamaǵan. Budan bólek, dekanat qyzmetkeri de osy derekterge mán bermesten faıldy búkil dekanatqa taratyp jibergen», - dedi S. Nurbek Parlament Májilisinde tilshiler suraǵyna jaýap bere otyryp.

Sonymen qatar mınıstr stýdentter buǵan deıin gınekologtyń tekserýinde bolǵanyn aıtty.

Aıta ketsek, «Páktik tizimindegi» stýdent qyzdardyń ata-anasy Qazaq ulttyq ýnıversıtetin jaýapqa tartatynyn habarlaǵan edik. 

Bıyl aqpan aıynda Almaty prokýratýrasynyń nusqaýymen derbes derekterdi taratý boıynsha sotqa deıingi tergeý bastaldy. 

Sol kezde de Ǵylym jáne joǵary bilim mınıstri Almatyda stýdentterdiń jeke málimetteriniń taralyp ketýine pikir bildirgen edi.