Padel alǵash ret Azııa oıyndarynyń baǵdarlamasyna endi
ASTANA. KAZINFORM – Japonııanyń Aıtı jáne Nagoıa qalalarynda 19 qyrkúıek – 4 qazan aralyǵynda ótetin jazǵy Azııa oıyndarynyń baǵdarlamasyna padel medaldy sport túri retinde alǵash ret resmı engizildi.
Qazaqstan padel federatsııasynyń baspasóz qyzmetinen málim etkenindeı, bul sheshim International Padel Federation, Azııa Olımpıadalyq keńesi jáne jarysty uıymdastyrý komıtetiniń úshjaqty kelisimi nátıjesinde qabyldandy.
Álemde asa tez damyp kele jatqan atalmysh sport túri úshin bul bolashaq Olımpıada oıyndarynyń baǵdarlamasyna engizý jolyndaǵy mańyzdy qadam bolyp esepteledi.
Halyqaralyq padel federatsııasynyń (FIP) prezıdenti Lýıdjı Karraronyń sózine qaraǵanda, Azııa oıyndary – Olımpıadadan keıingi iri mýltısporttyq forýmdardyń biri. FIP halyqaralyq talaptarǵa sáıkes týrnırdiń sporttyq bóligi men jarysqa daıyndyqqa jaýap beretin bolady.
Keıingi jyldary padel Azııada qarqyndy damyp keledi. Jańa klýbtar ashylyp, ulttyq federatsııalar men áýesqoı týrnırler sany kóbeıýde, al oıynnyń ózi jastar men salaýatty ómir saltyn ustanatyndar arasynda keńinen taralyp otyr.
Padeldiń Azııa oıyndary baǵdarlamasyna engizilýi Qazaqstan úshin de jańa múmkindikterge jol ashady. Sport túriniń medaldyq mártebege ıe bolýy ınfraqurylymnyń damýyna, balalar sektsııalarynyń ashylýyna jáne memlekettik qoldaýdyń kúsheıtilýine septese alady.
Qazaqstan padel federatsııasy 2023 jyly quryldy. Sol jyldyń shildesinde-aq Halyqaralyq padel federatsııasynyń tolyqqandy 70-inshi múshesi boldy. Federatsııa prezıdenti Arslan Ábilǵazınniń qoldaýymen Almaty men Astanada, elimizdiń ózge de qalalarynda jańa korttar salynyp jatyr.
Sarapshylardyń pikirinshe, 2026 jylǵy Azııa oıyndarynda padel jarysynyń tabysty ótýi bul sport túrin Olımpıada baǵdarlamasyna engizýdi odan ári ilgeriletýde mańyzdy alǵyshart bola alady. Bul Qazaqstan úshin de padel boıynsha halyqaralyq arenada ózin kórsetýge múmkindik beredi.
Federatsııa málimetine qaraǵanda, padel – raketkaǵa negizdelgen dop sporty. Ol jabyq keńistikte oınalady, tennıspen uqsastyqtary bar. Oıyn tennıstegideı ortada tormen oınalady, kort ta óte uqsas kórinedi. Tennıstegideı, oıynshylar dopty raketkasymen soǵý arqyly tordyń ústinen qarsylas jaǵyna berýi kerek. Degenmen, padelde jabyq korttyń qabyrǵalary, qorshaýy osy sport túriniń oıyn úrdisine berik biriktirilgen. Oıynshylar dopty oıynda saqtaý úshin ol qabyrǵa, qorshaýdan sekirgennen keıin dopty soǵýǵa ruqsat etiledi. Padeldi tek tórt oıynshymen jupta oınaıdy.
Meksıkalyq Enrıke Korkýera bul sport túriniń negizin qalaǵan. Korkýera 1960 jyldardyń aıaǵynda Akapýlkodaǵy úıinde oıyn kortyn saldy, biraq múliktik shekteýlerge baılanysty ol tennıs kortynan sál kishirek boldy. Tennıs doptaryn qatty soqqan kezde olar búkil alańǵa ushyp, kórshi úılerge soǵylatynyn baıqady, sondyqtan kortty jan-jaǵynan qabyrǵalarmen qorshap aldy.
Kádimgi tennıs raketkalary kortta tym kóp kúsh jumsaýdy qajet etti, sondyqtan Korkýera jáne onyń dostary oınaý úshin aǵash taıaǵyn qoldandy. Oıynshylarǵa qabyrǵalardan oınaýǵa múmkindik beretin ereje jasaldy.
Meksıkadan shyqqan padel negizinen Korkýeranyń dostary ynta bildirýiniń arqasynda tanymal boldy. 1974 jyly onyń dosy, hanzada Alfonso de Hoenlohe-Langenbýrg oıyndy Ispanııaǵa ákeldi. Al Hoenlohe-Langenbýrgtyń dosy Hýlıo Mendıtengýı oıyndy Argentınaǵa taratýda mańyzdy ról atqardy. Eki elde de padel fýtboldan keıingi eń tanymal ekinshi sport túrine aınaldy.
Eske sala keteıik, budan buryn qazaqstandyq tennısshiniń Úndistandaǵy jarystyń jartylaı fınalyna shyqqanyn jazǵan edik.
