Pablo Pıkasso, Anrı Matıss syndy uly sýretshilerdiń 1500-ge jýyq kartınalary áldebireýdiń qoımasynan tabyldy
ASTANA. 4 qarasha.QazAqparat - Germanııalyq polıtseıler buryn tárkilengen quny 1 mıllıard eýro bolatyn modernıst-sýretshilerdiń kartınalaryn tapty. Kollektsııada Pablo Pıkasso, Anrı Matıss, Mark Shagal, Paýl Klee, Maks Bekman jáne Emıl Nolde sııaqty tanymal avtorlardyń 1500-ge jýyq eńbekteri bar.
Sýretterdiń tabylǵany týraly aqparatty resmı túrde eshkim naqtylaǵan joq, ári joqqa da shyǵarǵan joq, dep jazady ITAR-TASS. Bul kollektsııa 2011 jyly tabylsa kerek, alaıda kúni keshege deıin, ıaǵnı Der Spiegel jýrnalısteri osy oqıǵa jaıly sóz qozǵamaıynsha, bul aqparat qupııada saqtalyp kelgen.
Jaýhar týyndylar ónertanýshy Gıldebrand Gýrlıttiń uly 80 jastaǵy Kornelıýs Gýrlıttiń páterinde saqtalyp kelgen. Kartınalar konservi ónimderi saqtalǵan qoımanyń ishinen tabyldy. Buǵan deıin atalǵan týyndylar 1945 jyly aǵylshyn-amerıkandyq avıatsııanyń Drezden qalasyn bombalaý kezinde joıylǵan dep sanalyp keldi.
Kornelıýs Gýrlıtt bılik ókilderiniń kúdigine 2010 jyldan beri alynǵan edi. Shveıtsarııadan Mıýnhenge bara jatqan poıyzda kezdeısoq tekserý barysynda kedenshiler odan qomaqta aqsha tapqan bolatyn. 2011 jyly kóktemde polıtsııa onyń páterin tintip, álemdik qundy zattarǵa tap boldy.
