Pesa jazam degen adamdarmen jumys isteýge bizdiń teatr daıyn - Áýbákir Rahımov
ALMATY. 5 qazan. QazAqparat - Dramatýrgııa qazir Qazaqstanda eń tıimdi janrǵa aınaldy. Bul týraly Almatydaǵy Qazaqtyń memlekettik Muhtar Áýezov atyndaǵy akademııalyq drama teatrynyń 87 maýsymynyń ashylý rásiminde aıtyldy.
«Pesa jazam degen degen adamdarmen jumys isteýge bizdiń teatr daıyn. Qazir baıqaýǵa qatysqan pesalarǵa 2 mıllıon teńgege deıin qalamaqy tólenedi. Al baıqaýdan tys kelgen pessalarǵa ózimizdiń teatrda 500 myń teńgege deıin qalamaqy tólenýde», - deıdi rejısser, QR eńbek sińirgen qaıratkeri Áýbákir Rahımov. Al ádebıet bóliminiń meńgerýshisi, teatrtanýshy, synshy Álııa Bópejanovanyń aıtýynsha, ádebıettiń dramatýrgııa salasymen aınalysýshylarǵa búgingi tańda zor múmkindikter týyp otyr. Onda birinshi, jaqsy shyǵarma jazǵandarǵa qomaqty qalamaqy beriledi. Ekinshi, dramatýrgterge pesasy sahnada qoıylsa ár qoıylymnan qosymsha túsim túsip turady. Sondyqtan qazir dramatýrgter ózgelerge qaraǵanda eń tıimdi jaǵdaıda deýge bolady.
"Birqatar dramatýrgııalyq baıqaýlarda sarapshy bolyp júrmin. Kóp jaǵdaıda pesalarda sahnanyń erekshelikteri eskerile bermeıdi. Jastardyń jazǵandary kóbine-kóp stýdııalyq dúnıeler. Ókinishke oraı olardyń biliktiligin kóterip, tájirıbe almasýyna áli kúnge deıin elimizde qolaıly jaǵdaı jasalmaǵan. Al kórshiles Reseıde bul jumys memlekettik deńgeıde jaqsy jolǵa qoıylǵan. Sondyqtan jyl saıyn teatr salasy 25-30 shaqty talantty jas dramatýrgter men rejısserlarmen tolyǵýda. Bizde bul máseleni teatrlar qazir óz kúshimen sheshýde", - deıdi Á.Bópejanova.
