Per Lýıdjı Pıtstsı: «Attıla» qoıylymynyń daıyndyǵy qyzý júrip jatyr
ASTANA. 16 qazan. QazAqparat - «Astana Opera» teatrynyń Álemdik tusaýkeserine oraı tórt kesh ótedi, dep habarlaıdy teatrdyń baspasóz qyzmetinen.
Basty kesh - 2013 jyldyń 21 qazany - Dj. Verdıdiń «Attıla» operasynyń tusaýkeseri. Kórermen nazaryna usynylatyn operalyq spektakldi daıyndaýǵa attary álemge áıgili sheberler shaqyryldy. Qoıýshy rejısseri, stsenografy, kostıým jónindegi sýretshisi - álemge belgili ıtalıandyq sheber, Frantsııanyń Qurmetti Legıony Ordeniniń ıegeri Per Lýıdjı Pıtstsı. Tamasha rejısser búgingisi men jumysy jaıly, aldaǵy josparlary týraly aıtyp berdi.
Per Lýıdjı Pıtstsı Astanaǵa 12 qazanda keldi. Bul maestronyń elordaǵa osymen ekinshi sapar shegýi. «Men Qazaqstanǵa birneshe aı buryn «Astana Opera» teatrynyń ártister jónindegi dırektory Ýılıam Gratsıozıdiń shaqyrýymen kelgenmin, óziniń ynta-jigerimen jańa óner shańyraǵyn birden unatýǵa májbúr etken teatr dırektory Tólegen Muhamedjanovpen kezdestim. Birneshe kún buryn Kameralyq zalda, óte joǵary deńgeıde ótken kontsertte boldym. Bárinen de meni «Astana Opera» orkestriniń birinshi skrıpkashysy Baǵdat Ábilhanovtyń oryndaýyndaǵy Jıýl Massneniń «Taıs» operasynyń «Tolǵanýy» tebirentti. Kezinde Venetsııadaǵy «La Fenıche» teatrynda osy operany qoıǵan sátterim esime túsip ketti», - deıdi Pıtstsı.
Qazir Per Lýıdjı Pıtstsı Dj. Verdı operasynyń qoıylymy men sahnalanýymen jumys jasap jatyr. Ol Qazaqstanǵa Italııadan jetkizilgen kostıýmder men dekoratsııalardy daıyndady. «Astanalyq «Attıla» qoıylymy Rım teatry operasynyń jýyrdaǵy qoıylymynan bastaý alady, alaıda bul dál sondaı spektakl bolmaıdy. Bizge dekoratsııalardy qazaqstandyq keń sahnaǵa saı keńeıtýge týra keldi. Ǵundardyń kostıýmine kelsek, olar qyzyqty etnıkalyq komponenttermen múldem jańasha jasaldy. Basym bóligi qaramen, altyn jáne aqpen úılesetin qyzyl tústi», - deıdi maestro.
Elimizdiń bas teatrynda ótetin qoıylymnyń tusaýkeserine sanaýly kún qaldy, repetıtsııa tolyq quramda júrip jatyr. «Bas keıipker Eldar Ábdirazaqov atalǵan qoıylymǵa qýana qatysty. Men Attılanyń keıipin adamgershiligi mol ári qaısar, soǵysta batyr ári adal, mahabbatqa kelgende meıirimdi ári qumar, Qudaı aldynda momyn adam etip shyǵardym. Men quramdaǵy ártisterdiń barlyǵyna úlken qurmetpen qaraımyn, ásirese dırıjer Valerıı Gergıevke erekshe senemin», - deıdi Pıtstsı.
«Attıla» qoıylymynan keıin «Astana Opera» teatrymen seriktestikti jalǵastyrǵyńyz kele me degen suraqqa maestro, taǵdyrdyń jazǵany bolar, bul jerge taǵy kelemin dep úmittenemin degen jaýap qatty.
