P. Diddy túrmeden merziminen buryn bosatylady
ASTANA. KAZINFORM — AQSh Federaldyq túrmeler bıýrosy jańartqan derekke sáıkes, P. Diddy degen laqap atpen tanymal amerıkalyq reper jáne prodıýser Shon Kombs 2028 jylǵy 5 aqpanda túrmeden bosatylady. Bul týraly Kazinform USA Today basylymyna silteme jasap habarlady.
56 jastaǵy reper Nıý-Djersıdegi túrmede 50 aılyq federaldyq jazasyn ótep jatyr. Onyń bostandyqqa shyǵý kúni buǵan deıin birneshe ret ózgergen.
Shon Kombs bastapqyda 2028 jylǵy 8 mamyrda bostandyqqa shyǵýǵa tıis edi. Alaıda onyń bosatylý merzimi birneshe ret ózgertildi. Federaldyq túrmeler bıýrosynyń derekqorynda Shon Kombstyń bostandyqqa shyǵý merzimi endi 2028 jylǵy 5 aqpan dep kórsetilip otyr.
Jaza merziminiń ózgerýine sottalýshynyń tártibi, qamaýda ótkizgen ýaqyty jáne qaıta qylmys jasaý qaýpin tómendetýge baǵyttalǵan arnaıy baǵdarlamalarǵa qatysýy sebep bolýy múmkin.
P. Diddy sońǵy 25 jylda alǵash ret ishimdik pen esirtkiden bas tartyp, salaýatty ómir saltyn ustanyp júrgenin aıtty. Qazir ol terapııadan ótip, ózge sottalǵandarǵa tálimgerlik etetin baǵdarlamany iske qosqan.
2025 jylǵy shildede alqabıler soty Shon Kombsty jezókshelik maqsatynda adamdardy tasymaldaýǵa qatysty eki bap boıynsha kináli dep tanydy. Sotta birneshe áıeldi, sonyń ishinde onyń burynǵy súıiktisi Kassandra «Kessı» Ventýra Faın men «Djeın» laqap atymen tanymal áıeldi tasymaldaý faktisi qaraldy.
Alaıda seksýaldyq quldyq jáne qylmystyq sóz baılasýdy uıymdastyrýǵa qatysty neǵurlym aýyr aıyptar boıynsha P. Diddy kináli dep tanylǵan joq. Reper ózine taǵylǵan seksýaldyq sıpattaǵy aıyptardy joqqa shyǵaryp, isin qaıta qaraýdy talap etip keledi.
2025 jylǵy qyrkúıekte AQSh prokýratýrasy P. Diddy-ge 11 jyl bas bostandyǵynan aıyrý jazasyn taǵaıyndaýdy surady.
Buǵan deıin Tramp reperdiń ózine raqymshylyq jasaýyn ótingenin rastady.
