Ozon, Wildberries sııaqty marketpleıstermen saýda jasaıtyndar neni bilý kerek
ASTANA. KAZINFORM – Saýda jáne ıntegratsııa mınıstrligi Tutynýshylardyń quqyqtaryn qorǵaý komıteti Ozon, Wildberries sııaqty marketpleıster tildik kedergi turǵysynan qazaqstandyqtardyń qoldaýyna qolaıly bolǵanymen aldanyp qalý qateri bar ekenin eskertip otyr.
- Qazir Ozon,Wildberries syndy iri marketpleıster elektrondy saýdada taýarlardy iri brendter men shaǵyn kásipkerlerge satýǵa yńǵaıly platforma usynyp otyr. Alaıda osy marketpleısterdiń artyqshylyqtarymen qatar, tutynýshylardyń quqyqtaryn qorǵaýǵa qatysty kóptegen suraq týyndaıdy. Marketpleısterde satýshylardyń tarapynan tutynýshylardyń quqyqtaryn buzý faktileri jıi kezdesedi. Mańǵystaý oblysynyń Saýda jáne tutynýshylardyń quqyqtaryn qorǵaý departamentine Ozon jáne Wildberries marketpleısteriniń ústinen 2024 jyly 323, al 2025 jyldyń basynda 19 ótinish kelip tústi, - dep jazylǵan málimette.
Komıtettiń deregi boıynsha túsken shaǵymdardyń jalpy sıpaty tómendegideı:
• Sapasyz nemese túpnusqa emes taýarlardy satý;
• Taýardy qaıtarǵan jaǵdaıǵa tutynýshyǵa aqshany qaıtaryp berýden bas tartý:
• Shaǵymdardy qarastyrý merzimderiniń uzaqtyǵy;
• Kepildik mindettemelerdiń tıisti deńgeıde oryndalmaýy.
Resmı málimetke sensek, atalǵan oblysta quzyrly organǵa túsken shaǵymdardyń bári qanaǵattandyrylǵan kórinedi.
Komıtet mamandary marketpleıs arqyly saýda jasaǵan qazaqstandyqtar taýar sapasymen baılanysty narazylyqtary bolsa, «Tutynýshylardyń quqyqtaryn qorǵaý týraly» Zańnyń 7-baby men 24-babyna súıene alatynyn aıtady.
Marketpleıster arqyly taýar satyp alar kezde qandaı tásilderdi basshylyqqa alý kerek? Tutynýshylardyń quqyqtaryn qorǵaý komıteti mynandaı keńes beredi:
1. Satýshymen jazysqan hat, habarlamanyń bárin saqtap, taýardyń foto/beınematerıaldaryn túsirý kerek;
2. Ozon/Wildberries qoldaý qyzmetine júginińiz – eger satýshy baılanysqa shyqpasa, qoldaý qyzmetine jazyńyz.
3. Memlekettik organdarǵa resmı shaǵym jiberińiz – eger marketpleıs talaptaryńyzdy qanaǵattandyrýdan bas tartsa, resmı shaǵym jasańyz.
4. Egerde sizdiń quqyqtaryńyz qorǵalmasa jergilikti oryndaǵy saýda jáne tutynýshylardyń quqyqtaryn qorǵaý bólimshelerine júginińiz.
Buǵan deıin keleshekte elektrondyq saýda salasynda jaýapkershilik onlaın satýshylarǵa ǵana emes, marketpleıs ákimshiligine de júkteletinin jazǵan edik.